सोम प्रसाद पाण्डे र राजनीति

नेकपा एमाले नेता सोमप्रसाद पाण्डे २०५१ सालयता पाँचवटा चुनाव लडेर चार वटामा विजयी भए । २०५१, २०५६, २०६४, २०७० र २०७४ सालका निर्वाचनमा पाण्डेको चुनावी अभियानका कमाण्डर थिए, ठाकुर गैरे ।

२०६४ को पहिलो संविधानसभाबाहेक अरू सबै निर्वाचनमा पाण्डेलाई विजयी बनाउन महत्वपूर्ण भूमिका खेलेका तिनै गैरे यसपालिको प्रतिनिधिसभा निर्वाचनमा पाल्पा–२ बाट उठेर पाण्डेयका लागि प्रमुख चुनौती बनेका छन् । एमालेमा आफ्ना नेता पाण्डेय नेकपा (एकीकृत समाजवादी)मा गएपछिको राजनीतिक अवस्था गैरेको लागि अवसर र चुनौती दुवै बनेको छ ।

पाल्पाको मदनपोखरामा जन्मिएका ६६ वर्षीय पाण्डेय कानुनमा स्नातक हुन् । २०३० सालमै नेपाल कम्युनिस्ट पार्टीको सदस्यता लिएका उनी शिक्षण पेशामा रहेका बेला बहुदलको पक्षमा सक्रिय हुँदा २०३६ सालमा ३२ दिन जेल परे ।

२०४० सालमा नेकपा (माले)को गाउँ कमिटी उपसचिव बनेका पाण्डेय इलाका सदस्यहुँदै २०५१ सालपछि लगातार १७ वर्ष जिल्ला कमिटी सदस्य रहे । त्यसपछि पाँच वर्ष राष्ट्रिय प्रतिनिधि परिषद्, केन्द्रीय विभागहरू हुँदै नेकपा (एमाले)को केन्द्रीय सदस्य र पाल्पा इन्चार्जको जिम्मेवारीमा पुगे ।

केही समय वकालत गरेका पाण्डेय नेपाल बार एशोसिएसन पाल्पाको अध्यक्ष पनि भए । २०५१ सालको मध्यावधि निर्वाचनमा पाल्पा–२ बाट भारी मतले प्रतिनिधिसभा सदस्यमा निर्वाचित उनी २०५६, २०७० र २०७४ को निर्वाचनमा पनि विजयी भए ।

पाण्डेयले २०६४ सालको दोस्रो संविधानसभा निर्वाचन भने हारे । २०७० सालको दोस्रो संविधानसभा निर्वाचन जितेका उनी २०७२ मा उद्योगमन्त्री बने ।

एमाले विभाजनपछि नेकपा (एकीकृत समाजवादी)मा आबद्ध भए । पार्टीको पाल्पा इन्चार्ज र लुम्बिनी प्रदेश अध्यक्ष रहेका पाण्डेय यो पटक पाल्पालीको समृद्धिका लागि काम गर्ने प्रतिबद्धता जनाउँदै मत मागिरहेका छन् ।

चुनावी अंकगणित

गत स्थानीय चुनावमा वडाअध्यक्षका उम्मेदवारहरूले पाल्पा–२ मा प्राप्त गरेको दलगत मतमा नेकपा (एमाले) अघि छ । एमाले एक्लैले ३० हजार ५६६, नेपाली कांग्रेसले २९ हजार ३९, नेकपा (माओवादी केन्द्र)ले ४ हजार ३१३, मंगोल नेशनल अर्गनाइजेसनले १ हजार १५१ मत पाएको छ ।

उम्मेदवार पाण्डेको दल एकीकृत समाजवादीले भने जम्मा ४३३ मत पाएको छ ।  पाण्डेसँगै एमालेका ठाकुर गैरेसहित १३ जना पाल्पा–२ को चुनावी मैदानमा छन् । स्थानीय चुनावको परिणाम ठाकुरका लागि बढी अनुकूल छ ।

स्थानीय चुनावमा एमालेले पाएको भोट मात्र जोगाउन सक्दा पनि उनी विजय नजिक पुग्ने हुनाले सत्ता गठबन्धनका उम्मेदवार पाण्डेयले आफ्ना राजनीतिक चेलालाई हराउन निकै मिहिनेत गर्नुपर्ने देखिन्छ ।