कविता: धेरै कुराहरू छन नमिलेका मसँग

 पुष्कर विष्ट

धेरै कुराहरू छन नमिलेका मसँग

--------------------------------------------

धेरै कुराहरु छन नमिलेका म सङ्ग 

खुट्टाहरु  बजाउदै हिड्छु 

जोडजोडले आवाज निकालेर हाँस्छु 

सूर्यको दशा र दिशा सङ्ग कुनै  पर्वाह छैन मलाई  

मेरो आफ्नै लय छ 

आफ्नै भाव छ 

आफ्नै आवाज छ 

जो मिल्दै मिल्दैन तिम्रो उच्चस्तरको संस्कार सङ्ग ।

धेरै कुराहरु छन म सङ्ग नमिलेका 

म मध्यरातमा एक्लै हिड्छु घरबाहिर 

मनोरञ्जनको लागि छिर्न सक्छु डिस्को र पबहरूमा 

झुम्न मन पराउछु ह्विस्की र सिग्रेटको नशामा 

तिमीले अोगटिरहेको अलिकति स्थानमा पाइला टकेको न हुँ म 

धेरै कुराहरु छन मसङ्ग नमिलेका 

लजाउदिनँ लज्जावति झार जस्तै 

मुस्कुराउदिनँ फूल जस्तै 

खिल्खिलाउदिनँ पानी जस्तै 

म सङ्ग धेरै कुराहरु छन नमिलेका 

जस्तो कि समाजसङ्ग छन मलाई नमिल्ने धेरै कुराहरु 

बधु शिक्षा छ 

आगोको पाठशाला छ 

रहरका पोकाहरु छन 

नियमका पुलिन्दाहरु छन 

हो म सङ्ग धेरै कुराहरु छन नमिलेका 

म भत्काउदै हिडिरहेको छु   तिम्रो आँखामा चट्ट मिलेको समाजको सोैन्दर्यलाई।